Azərbaycan Mərkəzi Bankı (AMB) 2025-ci il avqustun 1-dən etibarən "Bazel III" çərçivəsində Likvidliyin Örtülməsi Əmsalının (LCR) mərhələli tətbiqinə başlayacaq.

"Biznesxeber.az" xəbər verir ki, “Moody’s” reytinq agentliyi bu tənzimləmənin banklardan yüksək keyfiyyətli likvid aktivlərin həm milli, həm də ümumi valyutada tələb olunan həcmdə saxlanılmasını nəzərdə tutduğunu bildirib. Tam tətbiq 2027-ci ilin sonunadək başa çatdırılacaq.Qeyd edilib ki, yeni struktur kredit reytinqləri baxımından müsbət qiymətləndirilir və bank sektorunun maliyyə dayanıqlılığını artıracağı gözlənilir. Agentlik hesab edir ki, bu dəyişikliklər manatda davamlı likvidlik təminatını gücləndirəcək.

AMB-nin məlumatına görə, manatda likvid aktivlərin payı 2020-ci ildəki 46 %-dən 2024-cü ilin sonunda 56 %-ə yüksəlib.

Yeni qaydalara əsasən sistem əhəmiyyətli banklar 2025-ci il avqustdan manatda LCR-ni 50 %, 2027-ci ilin iyununda isə 100 % səviyyəsində təmin etməlidirlər. Digər banklar isə mərhələli şəkildə 2025-ci ildən 40 %, 2027-ci ilin dekabrında 100 % göstəriciyə çatmalıdır.

Həm milli, həm də ümumi LCR ayrı-ayrılıqda hesablanacaq və banklar bu məlumatları gündəlik olaraq AMB-yə təqdim edəcəklər.

Qaydalar çərçivəsində HQLA tərkibinə qiymətli metallar, dövlət zəmanətli aktivlər və digər uyğun aktivlər də daxil ediləcək. Bu, xüsusilə qeyri-sabit dövrlərdə bankların likvidliyini dəstəkləməyə yönəlib.

AMB bildirir ki, hazırda bütün banklar LCR üzrə mövcud normativlərə cavab verir. Sektor üzrə orta göstərici manatda 150 %, xarici valyutada isə 178 %-dir.

“Bu, bankların güclü likvidlik buferlərinə malik olduğunu və yeni tələblərə hazır olduqlarını göstərir”, – deyə “Moody’s” qeyd edib.